Sənət və ədəbiyyat dərgisi

Əgər sevməsəydiom bağışlayardım - Anna Axmatovanın şeirləri

19 Sentyabr 2022 / 10:00

 

Anna Axmatova

 

Sakit-sakit axır Don,

Ötür gecə səsindən.

Diksinir ay işığı

Bir İnsan kölgəsindən.

 

Dolub sahildə qadın,

Nə qazandı həyatda;

Əri qəbirdə yatır

Oğlu da qazamatda...

 

 

***

Mən badə qaldırıram

Viran qoyduğun evə,

Və...

səni sevə-sevə,

İçirəm yoxluğuna,

Bir də gözlərindəki

Ölü soyuqluğuna,

ikilikdə təkliyə.

Tanrı da bu sevgini

Xilas etmədi deyə...

 

 

***

Gülüşümə qırov düşür,

Bir ümid də solur demə.

Şaxtalı yel təb sovurur

Doğulacaq yeni nəğmə...

 

Bu nəğməyə qatacağam

Kinayəli gileyimi.

Sevgi dolu sükut yenə

Ağrıdacaq ürəyimi...

 

 

 

 

 

 

***

Mən qulaq asmırdım qapı dalından,

Səni izləmirdim səndən gizlicə.

Mən sənə güvəndim inandım sənə -

Bilmədim, sən məni aldatdın necə...

 

İndi gəlib üzr istəyəcəksən ,

Niyə bağışlayım,

Nəyi və kimə...

Səni sevməsəydim bağışlayardım

Nə üzlə qaytarım səni qəlbimə?!

 

 

***

Söylə mənim adım nəyinə gərək,

Sahildə əriyən ləpələr kimi,

Səsində qarıyan son kədər kimi

Dilinə dəyməmiş ölüb gedəcək...

 

Söylə, mənim adım nəyinə gərək,

Ölü iz qoyacaq and yerində o,

Yad dildə yazılan yazılar kimi

Qonub baş daşına cizgilənəcək...

 

Söylə, mənim adım nəyinə gərək,

Səni ki, könlümə yetirməyəcək,

Bir də o sevgini bitirməyəcək,

Öləcək meşənin gecə səsi tək...

 

Bir güncdə...

Qəlbinin qərib çağında

Kədərdən asılan tənhalığında

Həsrətin tarıma çəkilən vaxtı

Adım dodağına qayıdacaqdır...

 

 

 

 

 

 

 

 

 

***

Ah, nəyçün suyumu zəhərlədiniz,

Nəyçün çörəyimə çamur qatdınız?

Çalıb əlimdəki azadlığı, siz

Sonuncu çöp kimi oda atdınız...

 

Bilirəm suçumu,

öz dostlarımın

Məhvinə məzəylə yanaşmamışam.

Məni bezdirməyib dərdimin tamı,

Vətən-vətən deyib ötən bir quşam.

 

Tövbə köynəyində yüz şam əridi,

Hər ürək bu odu daşıya bilmir.

Dünya şairlərə edam yeridi

Şairlər cəlladsız yaşaya bilmir...

 

 

Təsəlli

 

Sən məndən məktublar almayacaqsan,

Eşitməyəcəksən mənim səsimi.

Mənim qəbrimi də tapmayacaqsan

Polşada pay verdim son nəfəsimi...

 

Burda yerim, ruhum qoy rahat olsun,

Səni kövrəltsə də müqəddəs itki.

Allah ordusunun əsgəri oldum

Savaş ordusundan düşsəm də itgin...

 

Ağlamaq günahdı, üzülmək günah,

Çəkmə gözlərinə qüssədən qara.

Deyirəm, sən özün kömək ol, Allah,

Mənu qərib yerdə qoruyanlara...

 

 

 

 

 

Erməninin dilindən

 

Yuxuna gələrəm qara qoyun tək,

Baxıb yazıq-yazıq mələyərəm, ah...

Necəydi bu axşam yediyin yemək

Necəydi bu günkü şamın, ey padşah?!

 

Nəfsin zəncir kimi sıxır milləti,

Çəkilib Allahın səbri tarıma.

Xoşuna gəldimi oğlumun əti

Sənə, arvadına, balalarına...

 

Çevirəni Ramiz Qusarçaylı

 

Məqalələrə, video-materiallara görə redaksiya yox, müəlliflər məsuliyyət daşıyır.