Rahid Ulusel

Sevgi və Gözəllik:

körpüləri, sıldırımları ilə

XXI əsrin aforizmləri

Dördüncü hissə

Ailə – özlərini bir-birinin yolunda qurban verə bilən insanların ittifaqı. 

***

Dərin məhəbbətlə sevən insanlar: onlar yer üzündə dahilər qədər azdır.

***

Bir-birini sevməyən kişi və qadın qaçqın kimi yaşayır öz Ailə-Vətənində.

***

Romantik qadınları sevmək və ram etmək üçün realist olmaq lazımdır.

***

Tarixin hərəkətverici qüvvəsi – kişi, Həyatın hərəkətverici qüvvəsi – qadın.

***

Sevmədiklərinə ərə gedənlər Tənhalıqdan yox, Təklikdən qurtulur.

***

Ağıllı kişilər qadını dərk edir, axmaqlar bütləşdirir, ortabablarsa arvad eləyir.

***

Qadınla kişi arasından altun dolu dəvə karvanı ötdü – eşqin gözü açılmadı. Qadınla kişi arasında altun saçın bircə teli əsdi – eşq titrəyib oyandı.     

***

Qadın – yarpaq dalında gizlənən gilas kimidir: gözəlliyi ilə, dadı ilə, sirri ilə, həyası ilə.

***

Gərək təyyarə biletlərinin qiymətinə stüardessaların təbəssümünü də daxil etsinlər.

***

Sevgi – dialoqun  ideal formasıdır.

***

Dünyada məhəbbət azaldıqca – ehtiras çoxalır.

***

Qadın qəlbinin atlasında gərək öz Vətənini tapa biləsən.

***

Qadın o şərabdır ki, içdikcə ayılırsan.

***

Günəşin üzü yalnız bir halda örtülsün – Sənin saçlarınla.

***

Sevgililər də gərək bir-birini tükəndirməyə.

***

Zinət taxmaları qadının əxlaq gözəlliyinin işığında daha parlaq görünür.

***

Ağıllı qadınlarla gözəl qadınlar məclisdə bir-birini təbii şəkildə kompensasiya edir.

***

Gözəlliyi və cazibədarlığı ilə  hamının diqqətini cəlb etsə də, saf, ismətli və ləyaqətli qadını qısqanmaq – onun mənliyinə toxunmaq deməkdir.

***

Qarğıdalı öz dənələrini sayınca, saçaqları uzanıb üzünü örtdü.

***

Ruhun poeziyası. Şair olmadan da  o həyatı doya-doya yaşayırsan. 

***

Gözəlliyə qarşı dayanan – eybəcərlikdən daha çox süni gözəllikdir.

***

Canımız özümüzü yaratmağa bəs edir.

***

Kiminsə darlığına sığmayan dünya kiçilməz.

***

Nifrət – Sevgi ərazisini işğal etdiyi yerdə köç salır.

***

Kişi yan gedir: deməli, qadının kompası düz işləmir.

***

Qadın və kişi bir-birinin ağıl və gözəlliyindən çox, stixiyasına aşiqdir.

***

Doğulmağımızdan illər öncə valideynlərimiz olacaq iki insan – bir qadınla bir kişi bizim nəyimiz idi?!  

***

İsmətli qadının gözəlliyi – onun zirehidir.

***

Ömür boyunca yaşanan sevgi – dənli bitkilər kimidir, əkilib-becərilib-bəslənildikcə artır: bir dənindən yüz dən!

***

Bir parası qadınını eksponat kimi saxlayır, suvenir kimi adam arasına çıxarır. 

***

Məsumluğu sadəlövhlük, saflığı anlaqsızlıq kimi yozmaq nə qədər kövrək mənəviyyatı gözdən salıb, alçaldıb və zəhərləyib.

***

Hər bir seçkin gözəllə – gözəlliyin dəyəri, statusu və meyarı yüksəlir.

***

Eşqdən doğulub-yoğrulmayanların sevgidən savayı bütün hissləri ürüyüb-artar.

***

Sevginin yaraları da gül açır.

***

İki sevgili üz-üzə, insanla təbiət üz-üzə: onlar susanda necə dərin ülviyyətlə danışırlar!

***

İlk sevgi – son nəfəs.

***

Qadınlıq – dərk olunur, qadın – duyulur.

***

Qadın məlahəti – insanlığın oksigeni.

***

Nikah oğlanı – kişi, qızı – qadın mərtəbəsinə yüksəldir. Birlikdə isə onlar nikahı – ailəyə çevirirlər.

***

Qadın – İncidir, ona görə incidir.

***

Adam var, on iki uşağın yiyəsidir, amma bilmir – nədir Eşq!

***

Əgər siz qadından ona “ağıllı xanım”, yoxsa “gözəl xanım” deyilməsinə üstünlük verməsini soruşsanız, bilin ki, mütləq o, dilində birincini, ürəyində isə ikincini seçəcək.

***

Ana ola biləcək qızlar, Ata ola biləcək oğullar dünyaya gətirin!

***

Ev – Akademiyadır.

***

Doğmalıq və dostluq: övladlarla birlikdə böyümək bu effekti verir.

***

Doğmalıq hissinin təbiiliyi sındırır asılılıq hissinin əsarətini.

***

Övladlarla məsafə saxlamaq çox vaxt onunla nəticələnir ki, valideynlər və övladlar belə uzaqdan daha bir-birilərini tanımırlar.

***

Gənclik – xatirə albomu deyil, heç zaman bitməyən, ömrünün sonunadək səninlə qalan çağındır, həyatını içirən, susuzluqdan qoruyan, qurumayan bulağındır – gənclik.

***

Qocalıq – Xocalıqdır. Qocalıq – başda gəzdirilən tac deyil, keçmişinə qərq olan nisgil deyil, titrəyən kirpiklər deyil, damarlanan əllər deyil, qürub rəngində parlaq bir Gələcəkdir! 

***

Gözəlliyə yanlış və yarımçıq yanaşma – onu yalnız gənclik çağında görür. Halbuki gözəllik – əgər sağlam və dolğun yaşayırsa, insanı heç vaxt tərk etmir, onunla birlikdə yaşa dolur, qocalır: müdrik ağıl kimi, gözəllik də öz kamilliyinə çatır.

***

Bir-birinə gülüş, çiçək, üzük bağışlayan sevgililər bilməlidirlər ki, onlar ailə qurandan sonra arabaya qoşulmuş qoşa atın yükünü də çəkməyə gərək hazır olalar.

***

Gözəllik – həyatın bəzəyi deyil, özəyidir.

***

Gözəllik – kosmetika ilə yox, kosmosla ülviləşir.

***

Kölgə də qaranlıqda yox, işıqda yaşar.

***

Gözəlliyi yaşada bildikcə yaşayırıq.

***

Əsl gözəllik odur ki, ətrafında da gözəlliyin toxumlarını əkir, bağını salır...