Azərbaycan Yazıçılar Birliyi, Azərbaycan Mədəniyyət Nazirliyi və “Space” telekanalının iştirakı ilə sentyabrın 27-dən noyabrın 9-a qədər Azərbaycan da daxil olmaqla 30 ölkədən 44 şair “Şuşa ili” çərçivəsində “Şuşaya salam!” layihəsində gözəl Şuşa üçün şeir oxuyacaq, şəhər haqqında danışacaqlar. Bu gün- 16 oktyabrda layihə Iran şairi Mustafa Məstur və onun Şuşa barədə ürək sözləri və Şuşaya ithafən qiraəti ilə davam edir.

Mustafa Məstur / İran

Mən Mustafa Məstur sevimli və sevdiyim Azərbaycan torpağının xeyirxah insanlarına bir o qədər də uzaq olmayan bir diyardan – İrandan salamlayıram. Xüsusilə də, poeziya, mədəniyyət və musiqi şəhəri olan gözəl Şuşa şəhərinin əziz sakinlərinə salam deyir, bu şəhərin sevimli insanlarını “Şuşa ili” münasibəti ilə təbrik edirəm. Heyrətamiz təbiəti, zəngin və məhsuldar mədəniyyəti olan şəhər! Aşiqlərin, muğam musiqisinin şəhəri! Qəlbində böyük musiqiçiləri, bəstəkarları, şairləri yetişdirən şəhər!

 Əslində, “Şuşa ili” adlandırılması Azərbaycanın bütün şəhərlərinin tarixi-mədəni kimliyinin vəhdətini vurğulamaq üçün bir bəhanədir. Beləliklə,  Şuşa, salam.

Bu münasibətlə şeirlərimdən birini bu gözəl, yorğun, yaralı, lakin xoşbəxt və azad şəhərə həsr etmək istəyirəm.

         Emalatxana

          Və anaların çoxu

qab-qacağı

və qəm-qüssəni yumaqla məşğul,

zindandakılar

günləri saymaqla.

Gəlinlər

gələcəyi toxumaqda

xəyalın və balın ipləri ilə.

Əsgərlər

savaşı məşq edir günlər boyu,

gecələr günləri saymaqla məşğul.

Xəstələr ölməklə,

həkimlər

ölümü cilovlamaqla,

möminlər

iltimasla,

aşiqlər

sevgi namələri ilə məşğul.

Filosoflar

suallara cavab axtarır.

Suallar

doğub-törəməklə.

Qatillərin başı

inadla, ümidlə və ehtiyatla

öldürməyə birini aramağa qarışıb.

və Tanrı

sükut və dözümlülük içində,

 qəbul və xəyal işləri,

bal və ölümlə məşğul.

Tərcümə: Ariz Tarverdiyev