Azad Yaşardan yeni PARODİYA
19 May 2022 / 08:32
Azad YAŞAR
"DÜŞDÜ" RƏDİFLİ NEOQOŞMA
Bayaq evin tinində ustad Aşıq Ələsgəri gördüm. Qucağı ərzaqla dolu olsa da, halı xeyli pəjmürdə idi. Səbəbini soruşanda mənə nə desə yaxşıdır:
Karantin günündə, super marketdə
Gözüm bir maskalı xanıma düşdü.
Asqırdı, öskürdü, heç acımadı,
Qatil virusları qanıma düşdü.
Diaqnozu dedim, dərdini bildi,
Gördüm həm xəstədir, həm əhli-dildi,
Atəşi qalxsa da, gözündən güldü,
Güləndə “qada”sı canıma düşdü.
"Ələsgərəm", viruslardan halıyam,
Dedim: səndən keçdi, koronalıyam,
Dedi: Çindən gəldim, özgə malıyam,
Maskam qanadım tək yanıma düşdü.