Bizdən küsəcəklər, ya özlərindən? - Nurəngiz Günün şeirləri
02 İyun 2022 / 15:45
NURƏNGİZ GÜN
SALAM ÇÖRƏYƏ, GÜLƏ, GÜNƏŞƏ
Salam sənə, İnsan!
Salam sənə, doğma yurd!
Doğma lisan!
Salam sənə, ən ulu eşq!
Bu torpaq!
Salam sənə, odlu diyar!
Yanar çıraq!
Salam sənə, anam!
Can yadigarım!
Salam sənə, nakam sevgim!
Rüzgarım!
Salam sənə, bircəciyim!
Evladım!
Salam sənə, kövrəkciyim!
Qanadım!
Salam sənə, dünyam!
Sərhədli dünyam!
Salam sənə, dumanlı, dərdli dünyam!
Salam sizə, dərin-dərin dəryalar!
Salam sizə, yalqız, yalçın qayalar!
Salam olsun, salam!
Bir də sizlərə -
Salam olsun, Təbrizli əzizlərə!
Salam olsun, ulduzlara, atəşə!
Salam, bir də çörəyə, gülə, Günəşə!..
1979
MƏNİM EŞQİM
Mənim eşqim rüzgarlardır -
dağ tanımaz, dərə bilməz.
Mənim eşqim ilk bahardır -
sevincləri saya gəlməz.
Mənim eşqim azad quşlar -
nə bənd bilər, nə də çəpər.
Mənim eşqim qaranquşlar -
ruhuma müjdələr səpər.
Mənim eşqim al səhərlər -
çiçəklər huşun itirər
Mənim eşqim ağ kəhərlər -
Təbrizə təbrik yetirər.
Mənim eşqim atəş, ocaq -
Novruzgülüm qızınacaq!
Mənim eşqim qucaq-qucaq -
Anam torpağa qonacaq...
2013
İNSANLARSIZ NƏYƏ LAZIMSAN, DÜNYA
İnsandır şeirimin
ilki və qurtaracağı.
İnsandır şeirimin
Odu, ocağı.
İnsandır yer üzünün
Çiçəklərdən əzəl bəzəyi.
İnsandır, insandır
Şeirimin rişəsi, özəyi.
İnsanların hamısı-
cavanı da, qocası da,
qarası da, sarısı da,
İnsanların azadı da,
dustağı da,
narahat ömrümün döyüntüsüdür,
İnsandır düşüncəm də, nəfəsim də.
İnsandır nəğməm də, titrəyən səsim də..
İnsanlarsız nə dəniz, nə sahil, nə qaya?
İnsanlarsız nəyə lazımsan, dünya?
1981
ULU NƏNƏM, GÜN XANIM, HEY!...
Bu torpağın öncə Günəşi doğub.
Bu torpaq sarı tellərdən yoğrulub.
Bu torpağın ulu nənəsi Gün xanım olub...
Gün xanım, Günəş xanım!
Andım, tanrım, imanım!
Yadındamı,
tellərindən bir cüt hörük toxudun,
bağışladın anama?
Hə, bax onu deyirəm, ey!
Allah apardı, getdi...
O telləri bu torpaqdan
uf demədən,
zorla qopardı, getdi.
Gün xanım, Günəş xanım!
Gözəlim, mehribanım!
O titrək əllərinlə
titrək kirpiklərimə
bir yol sığal çək!..
Yoxsa, yoxsa...
göz yaşlarım... donacaq,
qırov tutacaq onları...
Gün xanım, Günəş xanım!
eşqim, duam, qızıl banım!
Uzat sarı tellərini,
uzat, əllərim çatmır.
Uzat, uzat, sarıl mənə,
sarıl mənə, çək məni,
çək məni, apar məni.
Agah ol! Çatarsam,
odundan ovuc-ovuc udacağ
am...
Boğazımda qurşun qalacaq, Günəş!
Ləçəyinin istisinə... möhtacam...
Eşidirsənmi, ulu nənəm, hey!
Gün xanım, Günəş xanım!
Sapsarı xanımanım!
1983
TORPAQ YUXULARIM
Qayıtdım bu torpağa.
Bu torpağa dönüncə
dizlərim titrəyir...
Bu torpağın önündəyəm. Eləcə mil durmuşam,
dil tutulub, nəfəs təntiyir.
Bu torpaqda nələr tapdım, nələri itirdim!
Bu torpağın üstündəki yuxularımda,
Ağappaq örtüyümdə ağappaq gəlin olub,
tutulub-dolub,
bir rüzgarın tilsiminə əsir düşdüm.
Bir çiskini yağış bilib, bihudə üşüdüm.
... Bu torpağın üstündən Araz adlı bir çay axar –
Qubar dolu suyundan hönkürüb şərbət içmişəm.
Kənarında dəmir çəpər var!
Bu çəpərin küncündə ölmək üçün
üç arşın yer seçmişəm.
Bu çəpərin küncündə atamın ləpirləri!
Bu çəpərin küncündə anamın həsrət əlləri!
Bu torpaqda nələr tapdım, nələri itirdim.
Bu torpağın üstündə bir qoşa məzar var –
Bürünüb göz yaşına,
sərilib soyuq daşına,
bu candan ruh çıxınca,
tabım, tavanım çatınca
içim yanar, yaxılar.
Biri atam, biri anam!
Vardı, vardı! Vallah, vardı!...
Hər ikisin bir uzun, zalım yuxu apardı.
Əlim əllərindən qəfil düşdü.
Yerdə qalan nə idi ki! Uşaq könlüm!
O da fəğan qoparıb,
haqsızlıqdan büzüşdü...
Bu torpağın içindəki yuxularımdan
zərif, kövrək, bir ağappaq ömür sürüşdü...
qara sellər apardı...
Bu torpaqda nələr tapdım, nələri itirdim!
1983
QƏFƏS BÜLBÜLÜ
...Pulum olmasaydı,
ala bilərdimmi
bu qəfəs bülbülünü?
Düz bir il əvvəl
itiribmiş
çəmənini, gülünü.
Bir mahir ovçunun
şikarı bülbül!
El içində sevdalı eşqinin
aşkarı bülbül!
Uç, uç!
Aldım bu qəfəsi,
açdım bu qəfəsi,
Açdım və buraxdım səni.
Uç, uç!
Geniş ormanlar yaxşıdır.
Baxma ki, pələngi, aslanı var.
Uç, uç!
Ormanlar bir yaşıl nağılın yağışıdır...
Pulum çatdı
bu biricik qəfəs azadlığına.
Və əgər,
İşdi-şayəd,
pulum daha çox olarsa,
onda açıb buraxacam
dünyadakı
bütün
haqsız
qəfəs düçarlarını!
1979
MİN İL SONRA
Görən
min-min illər indən sonra
Neytron qorxusundan
maya çəkmiş körpəcələr
Necə, nə cür düşünəcək,
arxamızca nə deyəcəklər?
Lüğətləri olacaqmı?
Lüğətlərində
“müharibə”,
“eşalon”,
“talon”,
“Zəmanət”,
“əmanət”,
“əmanət kassası”,
Yaxud, tutalım “səbr kasası” – xülasə,
bənzər daha başqa-başqa sözlər
yurd salacaqmı?
Min il sonrakı uşaqların
Oyuncaqları olarsa,
Oyuncaqlara başları aldanmazsa?
Görən
ətli, büzük dodaqları
yenə də sallanacaqmı?
“Məhkəmə”, “Akt”, “İnfarkt” –
Yəni belə-belə zarafat
Gedib onlara çatmaz ki,
Sallanmaz ki, ömürlərindən?
Görən min-min illər
İndən sonrakı körpəcələr
Bizdən küsəcəklər,
Ya özlərindən?
11982
MƏSƏLƏ 1983
“Cəbri-üsul”, “Cəbriyyətun”. “Əl-cəbr”, “Alqebra”.
Çətinmiş, çətin. Mən hara, bunlar hara?
Əlqərəz, “Cəbr”.
Səbr elə, səbr.
Əvvəl böl, sonra vur, indi çıx.
İndi də bir-birinin üstünə gəl.
Əngəldir, əngəl.
Bir yandan da bu kəsr!
Nəfəsimizi kəsir!
Hələ bu harasıdır?
Məsələnin yarısıdır.
Çox şeyləri anıram,
yüzdə biri qanmıram.
Bax bu 100, bu da 1.
Yəni rəqəm-100, başında tir,
üstündə bir.
Bax, bu cür:1/100
Tapdım təsəlli,
beləymiş həlli:
Yuxarıdakı ömür,
altdakı qayğı.
Vay səni!
Heç bilməmişəm, nə yaxşıymış uşaqlıq çağı?..
1983
BOŞLUQ
Bomboş bir səssizlik,
bomboş...
Boşluqda nə sevgi, nə nifrət, nə səadət, nə hiss, nə səs!
Atlıydım. Bəs hanı? Qamçım vardı, bəs hanı?
Atım sizə qalsın. Qaytarın qamçımı!
Qamçılamaq istəyirəm
bu boşluğu!