Sözün Nəsimi taleyi - Sona Vəliyevanın yeni şeirləri
15 Noyabr 2022 / 09:14
SONA VƏLİYEVA
Sözüm
Qoymaz bir kimsədən minnət götürəm,
Ölüm xəbərimi söz yetirəcək.
Oğuldan, uşaqdan, dostlardan qabaq
Mənim cənazəmə sözüm girəcək.
Zəif misralarım, yarımçıq şeirim
Südəmər körpətək durmaz, ağlayar.
Dərd-sərdən balamın səsi batanda
Sözüm qızım olar, məni oxşayar.
Deyər “yad ağlayar, yalan ağlayar”,
Oxşayar doğmadan doğmatək məni.
Qəlbimin əkizi vəfalı sözüm
Ölümü öldürüb yaşadar məni.
Gedərəm nigaran olan-qalannan,
Qalar min dodaqda, dildə sözlərim.
Mənsiz darıxanda çiçəyə dönüb
Döşənər qəbrimin üstə sözlərim.
Qalacaq ruhumun yükü sözümdə,
O, məndən doymadı, doymadım ondan.
Mən “Ol”la gəlmişdim, “Öl”lə gedirəm,
Yaşamaq ümidim başlayar sondan.
Darıxan adam
Qar yağıb altında qalıb,
Külək sovurub aparır.
Ruhu içində qəribdi,
Burda bir adam darıxır.
Darıxır, bir gedəni var,
Gəlsə, günəş də çıxacaq.
Sükut içini doğrayır,
Köməyə kimi çağıraq?
O, iki daş arasında
Sıxılan bir əl kimidir.
Ömrü qəmlərin girovu,
Ümidlərini kiridir.
Çiynində dünyanın yükü,
Kirpikləri gözə çəpər.
Özünü dözümdən asıb,
Ağlamır ki, kimsə görər.
Doğmaların da içində
Tənhadır darıxan adam.
Qaya gücü hey ovulur,
Dağılır darıxan adam.
Evində qərib kimidir,
Hamı yad, hər şey də özgə.
Döyür içinin qapısın –
Bir kimsə tapıldı bəlkə.
Sözün Nəsimi taleyi
İlahi, heç bitməz dərdi dünyanın,
məni haqqı danan sözlər ağrıdar.
Şairə şeirindən tonqal qalanar,
misralar köz olar – könül dağlanar.
Nahaq gülüşündə, haqq göyüm-göyüm,
abid namazına şeytanlar şərik.
Şair vəhy elçisi, soyulsa demək,
Allahın lütfünə üsyan etmişik.
Könlü haqq çağırar haqq şairinin,
şeirindən yer üzü güc alar, durar.
Zahid ibadətdə, eşqdən xəbərsiz,
şair göy adamı, yerdə kimi var?
Şairi soyarkən söz mayasında
Allahın özünü görüb qorxdular,
Mələklər şairin söz yarasına
şeir duasıyla məlhəm qoydular.
Haqq sözü Tanrıdan ölçü-biçili,
şeirin təməlində haqq var, insan var.
Şeytan dar ağacı qurar, amma ki,
şairlər asılmaz, şair qeyb olar.
Sözü göndərən də, qələm də Allah,
söz dən, dəyirmançı şair əməyi.
Müşfiqin, Cavidin səma şeirindən
Nəsimi dərisi bayraqtək əsir.
Qızıl balıq
Dənizdən çayın mənsəbinə,
axının əksinə,
ölümün aydınlığına doğru,
sondan yeni əvvəl başlatmağa
doğru üzür qızıl balıq...
Balıq bəxtinə, su taleyinə
özünü qurban verərək,
yeni-yeni ömür yaşatmağa,
bitməyən tale nəğməsi yazmağa doğru
üzür...
Mən etdiyim yaxşılıqlardan
aldığım zərbənin əksinə,
sadəcə,
nankor dostlardan
üz çevirib,
sükuta doğru gedirəm...
İndi mən
haqsızlığa qarşı mücadilədə yalnız
özüylə dava başlayan,
qalanlara qıymayan,
tənhalığa sevdalanan,
içinin harayında özünü boğan,
balıqdan qəhrəmanlıq,
cəsarət öyrənən
kamikadzeyəm.
İntihar sənə üsyansa,
günahımdan keç, İlahi!