"Şuşaya salam!" XXXI gün

Azərbaycan Yazıçılar Birliyi, Azərbaycan Mədəniyyət Nazirliyi və “Space” telekanalının iştirakı ilə sentyabrın 27-dən noyabrın 9-a qədər Azərbaycan da daxil olmaqla 30 ölkədən 44 şair “Şuşa ili” çərçivəsində “Şuşaya salam!” layihəsində gözəl Şuşa üçün şeir oxuyacaq, şəhər haqqında danışacaqlar. Bu gün – 27 oktyabrda layihə tanınmış Monteneqro şairi Bojidar Proroçiçin Şuşa barədə ürək sözləri və Şuşaya ithafən qiraəti ilə davam edir.

“Əziz Azərbaycanlı dostlarıma salam olsun. Qədim mədəniyyət paytaxtı Şuşaya salam olsun.  Mən Bojidar Proroçiç, Monteneqronun Çetinye şəhərindənəm. Şeirim Şuşa şəhərinə həsr olunub.  Azərbaycan və Monteneqro həmişə var olsun…”

Bojidar Proroçiç

Şuşa

Ey Şuşa, sən azadlıq sözündən yoğrulan,

dağlarda gizlənmiş bir incisən.

Şairlərin, yazıçların

 və musiqiçilərinlə

mayak kimi bugün öz gücünlə

bizi işıqlandırırsan.

Damarlarında azadlıq ruhu axan

 ləyaqətli övladların səni qaytardı.

 Gözləri yolda qalmış əziz Şuşa,

 sən həmişəlik azadsan!

Tərcümə: Səlim Babullaoğlu